Category: музыка

Category was added automatically. Read all entries about "музыка".

Морамось – васенце таркасо

УЛЬЯНА КУЛИКОВА АШТИ МЕЛЬСЭНЬ ВИШКА ТЕЙТЕРНЕКС. «ВАЙ, КОСТОНЬ НЕТЬ ИНЖЕТНЕ» – ИСТЯМО МОРО МАРТО СОН ВАСТСЬ МИНЕК, ИНЖЕТНЕНЬ, ПОКШ ИГНАТБУЕСЭ. УШ СЕСТЭ ВАЙГЕЛЕЗЭ ВИЕВЕЛЬ ДЫ МОРАСЬ СЕДЕЙШКАВА. МЕКС-БУТИ АРСЕЗЕВИНЬ: ВАНА ТЕ ЭЙКАКШОНТЬ ЭЙСТЭ ЛИСИ МОРЫЦЯ!


Collapse )
Ней тейтересь прядсь 10 класст. Ламо мель яви морамонтень. Аволь умок Интернетсэ гайгезевсть моронзо-клипензэ. Те – Ине Изнямонтень алтазь «Синий платочек» ды «Шёл казак» моротне, конат ютавтозь эрзянь кельс.
Чачсь Ульяна Покш Игнатова велесэ. Морси эйкакшпингстэ саезь. Ды кода а морсемс? Сонзэ весе малавиксэнзэ моронь вечкицят, ломантненень паро ёжонь казицят. Бабазо, Полина Макаровна, морси. Ульяна ледстни, сыть бабанзо ялгатне тенст инжекс, кортыть-теить, морамо уставить. Тейтернесь кунсолы-кунсолы, сонгак мартост моро серьгеди. Авазо, Ирина Григорьевна, важоди Покш Игнатовань Культурань кудосо художественной самодеятельностень ды клубонь тевень коряс отделэнь прявтокс. Крёстной тетязо – Евгений Куликов – Культурань кудонь морыця. Ульянаньгак творческой кизэ ушодовсь сисем иесэ, зярдо ветизь клубов. Вейкеяк концерт эзь юта ды нейгак а юты сонтемензэ. Морамонь коряс васенце тонавтыцязо ульнесь Галина Александровна Сухойкина. Мейле превс путомат тензэ макссь Людмила Ивановна Ендолова. Теде башка, тейтересь сонськак тонавтнесь, вешнесь, ламо мель явсь музыкантень. Тонавтнесь музыкальной школасо.

Ульяна морси раськень морот. Мельс тукшныть тензэ рузонь ды эрзянь раськень моротне. Аволь весть невтнизе прянзо республикань ды весероссиянь пелькстамотнесэ. Свал морси «Шумбрат, Мордовия!» республикань фестивальсэ, кочкакшнызь морамо Гала-концертсэяк. Зярыя иень перть пелькстась «Пластилиновая ворона» эйкакшонь творчествань фестивальсэнть; «Вызов» морамонь пелькстамосонть;
2017 иестэ Московсо лиссь 1-це степенень лауреатокс «Top music»   Раськеютконь музыкальной конкурссонть-премиясонть, теке жо пелькстамосонть 2018 иестэ лиссь 3-це степенень лауреатокс;
2018 иестэ «Чудеса искусства» эйкакшонь ды од ломанень творчествань Раськеютконь фестивальсэнть лиссь 1-це степенень лауреатокс;
2019 иестэ занясь васенце тарка «Александр Невский – Слава, Дух и Имя России» Регионъютконь проектэнь эсенек ёнксонь этапсонть;
2020 иестэ Рязаньсэ «Праздничная карусель» Регионъютконь фольклоронь пелькстамосонть-фестивальсэнть лиссь 2-це степенень лауреатокс. Кода корты Ульяна, омбоце таркась сонзэ туртов теке васенце тарка. Пелькстасть ламо виев морыцят. Нама, лия ёнкссо эсь вийтнень варчамось, прянь невтемась максы вийть. Ульянанень пек вечкеви морамось. Пштистэ ваны Пелагея Россиянь морыцянть творчестванзо мельга. Ламо лезкс ды превс путомат тензэ максыть Покш Игнатова ёнксонь од морыцятне Ирина Учаева (сон морси «Умаринасо») ды Артем Мамаев (морсесь «Росичсэ»).

Сон зярс а соды, сюлмасы эрямонзо музыкальной творчестванть марто эли арась. Тейтересь парсте, «ветес», прядынзе 10 класстнэнь. Музыкадо башка, вечки точной наукатнень – химиянть, биологиянть. Артовксонзояк мазыйть. Тень уш редизь Саранскоень тонавтыцятне. Ульянань тердить тонавтнеме художественной училищав, музыкальноев…Тейтересь а капши. Сон арси. Тонавтни ды пурны превть эрьва кодамо ёнксонь коряс. Ульянань а эрси юткошказо. Вишка шкасто саезь яксесь весе кружоктнева. Валонзо коряс, пек вечксы рузонь народной творчестванть: моротнень, киштематнень, росписенть, музыкальной инструментсэ налксеманть, викшнеманть, кодамонть. Кишти ДК-нть юрсо «Девчата» киштемань куросо, конань вети А.И.Занкин хореографось.

Мель яви фотографиянтень. Седеезэяк витеви, зярдо удалы кундамс пертьпельксэнь ёжонть. Ломантнень туртов тейни фотосессият. Весе фотографиятне путозь интернетсэ. Ды ялатеке морамось – васенце таркасо.
Аволь умок сонензэ пшкадсь Р.Д.Жегалина тонавтыцясь. Кучизе «Синий платочек» моронь эрзянь кельс ютавтовксонть ды мерсь варчамс морамс. Истя лиссь васенце видеось. Ломантне вастызь сонзэ мельспаросо. Мекс а теемс мезеяк лия? Те тевсэнть кундась тензэ лездамо Иван Бублиенко звукорежиссёрось. Ды вана уш анок «Шёл казак» эрзянь кельсэ морось, конань тагояк ютавтызе Р.Д.Жегалина. Ульяна явизе ды морызе колмо вайгельсэ. Сонзэ снимизь садпиресэ, цветиця-панжиця чувтотнень ало. Вай, кодамо лиссь мазычи! Седеяк ламо лембе валт алтасть од тейтерентень. Муинк, варштынк интернетстэ. Неть васенце теевкст, васенце эскелькст, кадык кияк а карми сялдомост. Клиптнеде мейле чачсть ламо лия мельть-арсемат: мезе од морамс, кода снимамс. Улить эсензэ сёрмадозь мороткак. Кемтяно, весемесь те мазый ды превей тейтеренть удалы. Валдо ки теть, Ульяна!

Татьяна Маторкина


Вай, лазнэ, вай, лазнэ!
(«Шёл со службы казак молодой» моронть коряс )

1.Служавсь цёрась ды кудов
                  сыргась,
Виде кись леень трокска
                  ютась.
Печтямо лазось сивсь,
Цёранть  пильгесь  ваясь,
Кем потмос кельме ведесь                      совась.

2.Кузсь сон леень сэрей
                 чирентень,
ды толбандя кирвазсь
                 чирентень.
Вакска тейтерь ютась,
Цёранть малас лоткась:
– Мезе мартот теевсь? –
       тензэ пшкадсь.

3. – Кемсэнь кал ульнесь мелем
                  кундамс, –
Мерсь тейтерентень ёжов
                 цёрась, 
Ламо ведев леесь, тень эзь
       понго калнэсь,
Монь кем потмозом совась
                 ведесь.

4. Мерсь тейтернесь
мизолдозь: – Цёра,
Иля чентя качамсонть чама!
Иля капша туемс, бути ули
                 мелеть,
Костясынек кудосон кеметь.

5. Апак урьваксто цёрась
                 ульнесь.
Аволь мирдень экшсэ
                 тейтересь.
Вай, лазнэ, вай, лазнэ!
Леень трокска лазнэ!
Тунда  цёранть сон
                 урьвакстызе!

Эрзянь кельс ютавтызе
Римма Жегалина

ПАЗЯЛГОСО – ЭРЗЯНЬ ПОКШЧИ

Пенза ёнксонь Бессоновань райононь Пазялго велесэ эрьва иень Тровицясто тешкстыть Эрзянь покшчи. Ламоксть савкшнось марсемс, кода Пазялгосо ютавтови сон. Эрьвась шнась, паро мельсэ ёвтнесь, ледстнесь, тердсь молемс. Ды вана понгинек тозонь васенцеде.

DSC_0062.JPG
Collapse )

А.Е.Пивкин: «Кода чачни музыкась – те а ёвтневи…»

Пивкин Андрей Ефимович – МР-нь культурань заслуженной роботник, МР-нь Госпремиянь лауреат, Россиянь Композиторонь союзонь член. 1978 иестэ саезь важоди Саранскоень Л.П.Кирюковонь лемсэ музыкальной училищасо. Аволь умок МР-нь Прявтонть В.Д.Волковонь лиссь Указозо, косо пачтяви музыкальной искусствань коряс премиянь максомадо. Сон максови «Концерт для скрипки и камерного оркестра» музыкальной сехте вадря произведениянть кисэ.

IMG_2749.JPG

Collapse )

«Мон эряван, зярс эрить эрзятне...»

А.С.Пушкин лемсэ республикань Национальной библиотекасо ютась «Мон эряван, зярс эрить эрзятне» творческой чокшне, кона алтавсь эрзянь поэтессанть Раиса Кемайкинань 65 иень юбилеентень. Тей сакшность сонзэ малавиксэнзэ, ялганзо, творчестванзо вечкицянзо. Библиотекань национальной, финнэнь-угрань ды краеведениянь отделэнь важодицятне пурнасть покш выставка, косо невтевсть Маризь Кемалень книганзо, произведениянзо, конат лиснесть эрьва кодамо изданиясо.

DSC01292.JPG

Collapse )

«Велень озксось»-2015 Ташто Кшуманцясо

Июлень 11-це чистэ Покш Игнатбуень Ташто Кшуманця велесэ ютась «Велень Озкс». Кода свал, кенярксчинтень пурнавкшность ламо инжеть. Колмо иес весть юты Раськень Озкс, эрьва иестэ – Велень Озкс. Вельмевтезель те коесь 90-це иетнестэ. Седикеле озкстнэсэ ломантне пшкадильть Инешкипазонтень ды покштяст-бабаст туртов. Сокицятне-видицятне учильть сюронь касома (озность-вешсть сэтьме паро пиземеть), эрзятне энялдсть апаро вийде ванстома, шумбрачи, уцяскав эрямо. Сынь аволь ансяк озность, истя жо морсесть, киштсть, налксесть.

DSC00274.JPG

Collapse )

«ОД ВИЙ»-2015

Эрзянь ды мокшонь кельтнень чистэнть Саранскойсэ ютась «Од вий» эстрадань моронь Весероссиянь фестивалесь. Коень коряс эрзянь ды мокшонь эстрадань моронь пелькстамонть ютавтыть МР-нь Культурань ды туризмань министерствась, «РФ-нь Финнэнь-угрань раськетнень ассоциация» общественной движениясь ды Республикань раськень творчествань кудось. Тедеде конкурсось мольсь вейксэцеде. Морыцятне сакшность республикань районтнэстэ ды Пенза, Н.Новгород ёнкстнэстэ.

Collapse )

Бакич Видяй – сон истямо вейке…

Эрзянь ды мокшонь национальной театрасо ютась эрзянь содавикс морыцянть Бакич Видяень концертэзэ. Меельцеде Виктор Чичайкин (истямо алкуксонь лемезэ) пурнакшнось концерт васоло 2011 иестэ. Весе те шканть перть сон сёрмадсь од морот, ардтнесь республикань районтнэва ды, нама, республикань томбале эриця эрзятненень.
Виктор чачсь Дубёнка ёнксонь Поводелесэ. Н.П.Огарёв лемсэ МГУ-нь Национальной культурань институтонть прядомадо мейле велявтсь тиринь ёнксов. Тосо сон эри нейгак. Важоди Дубёнкань культурань кудосо. Морси «Морамо», «Русская душа» ансамблятнесэ ды ськамонзо.



Collapse )

ВАСТАЗЬ ЧИ

Июнень 15-це чистэ Самара енксонь Борской райононь Коноваловка эрзянь велесэ ютась «Вастазь чи» кенярксчи.
«Вастазь чи» (лиякс тензэ мерить «Вастази», «Ватази», «Ватазей») – те тундонь ильтямонь кенярксчи ды теке марто кизэнь вастома, умок уш прядовсть сокамонь-видемань тевтне. Малав ниле пингень перть тешкстыть те покшчинть. Коноваловкасо умонь шкасто саезь вейсэ эрить эрзят ды рузт. «Вастазинть» весе велесь тешксты мазыйстэ, келейстэ. Кезэрень шкане те чистэнть кудотнень свал наряжильть килеень, укшторонь тарадсо, кодыльть цецянь каштазт. Од цёратне ды тейтертне эрзянь палясо-панарсо наряжазь якильть велева кудодо кудос ды морсильть морот, киштильть.

Collapse )

"АРВО" - ТУНДОНЬ ЛЕЙ

Ялгат! Пачтян тенк паро куля. Окойники лиссь Николай Карповонь "ТУНДОНЬ ЛЕЙ" од дискезэ.
Сонзэ презентациясь ульнесь чадыковонь 25-це чистэ А.С.Пушкин лемсэ республикань Национальной библиотекасо.Те вастовомасонть морась ды седясь аволь ансяк Николай, сонзэ паро ялгатнеяк. Ней сынь вейсэндясть «Арво» лементь ало группантень. Седицятне: Андрей Кузнецов, Сергей Тарпищин, Александра Арапова ды Татьяна Тишина. Те альбомсонть моротне эрзянь содавикс поэтэнть Александр Араповонь. Кавтотне – эсензэ Колянь. Церась сонсь арсесь музыка. Дискенть анокстась аволь вейке ие. Ней сон микшневи.




Collapse )

Эрзянь келень чись – Дубенкасо

Тедеде эрзянь ды мокшонь келень читне тешкставсть республикань весе районтнэсэ. Дубенкань районсо кенярксчись мольсь Дубенкань средней школасо. Тей сакшность райононь весе эрзянь школатнестэ кода тонавтыцят, истя тонавтницяткак. Весе инжетнень кши-сал марто вастась «Морамо» ансамблясь. Ванодо тосто фоторепортаж)




Collapse )