Category: литература

Category was added automatically. Read all entries about "литература".

«Монень вечкеви важодемс ломантнень марто…»

А.С.Пушкин лемсэ Национальной библиотекасо сон мизолдозь васты эрьва ловныцянть, муи кель-вал ломантнень марто. Бажи лездамс эрьванень, кие тензэ пшкади. Те авась весе седейсэ топавты эсь тевензэ. Кода а топавтомс, бути те важодемась вечкевикс ды канды кеняркс.

Collapse )

Тонавтыцянть туртов сехте паро казнесь – эйкакштнень изнявкстнэ


Любовь Михайловна Русяева комсте ламо иеть важоди Отяжелень средней школасо. Сон вети эрзянь кель, рузонь литература, эрзянь ды мокшонь ёнксонь культурань история. Важоди 6-це, 7-це, 10-це ды 11-це класстнэнь марто. Теде башка, тонавтыцясь вети литературно-драматической кружок, ков мельспаросо яксить кода вишкине тонавтницятне, истя покштнеяк. Нама, эйкакштнень ютксо улить эрьва кодамо раськень тонавтницят. Седе ламо эрзянь ды рузонь.

Collapse )

«Сёрмадыцясь вешни ёвксонь мастор…»

Васенцеде Алина Подгорновань неия од сёрмадыцянь семинарсо. Сестэ сон тонавтнесь школасо. Е.Биушкинань марто Дубёнкань буестэ сынст ускокшнынзе эрзянь прозаикесь Л.П.Седойкин. Мейле эрьва ие карминек вастневеме литературань семинартнэсэ. Минь кода-бути сеске муинек вейкень-вейкень марто кель-вал ды теевинек ялгакс. Умок бажинь теемс мартонзо материал, ёвтнемс те од, мазый, превей тейтерденть, кона нолдась стихень кавто пусмот. Ды кода сондензэ а пачтямс? Алина лиссь «Иень поэт» Весероссиянь пелькстамонь финалс.
_MG_4393..JPG

Collapse )

КНИГА КЕЧЕНЬБИЕДЕ

Январень 21-це чистэ Орданьбуень райононь Администрациясо ютась покш вастовома. Тесэ мольсь «Кеченьбие-Жабино» книгань презентациясь. Кенярксчинтень сакшность Кеченьбиень ды Орозбиень эрицятне. Орозбиестэ ульнесь «Паро ялгат» ансамблясь. Теде башка, ульнесть покш инжетькак: Саранскойстэ сакшнось филологиянь наукань докторось, профессорось Михаил Васильевич Мосин. Сон чачсь, эрясь ды важодсь Кеченьбие велесэ. М.В.Мосин ёвтась ламо лембе валт книгань теицятненень, ды мерсь: «Книгань нолдамось – те покш паро тев аволь ансяк велень эрицятненень, весе Мордовиянь келес эрзятнененьгак».
жабино.jpg
Collapse )

«ВАЛ» – эрзянь од сёрмадыцянь куро

Малав кавто иень перть «Сятко» журналонть юрсо важоди эрзянь од сёрмадыцянь куро. Куроксто те вейсэндявксонтень путозель лем ­– «ВАЛ». Ковозонзо весть тей пурнавкшныть од ломантне, ловныть произведенияст, кунсолыть вейкень-вейкень мелест, кортыть литературадо, од книгатнеде. Косто чачсь мелесь пурнавомс вейс? Кавто иеде икеле «Сюлгамо» арт-салонсо мольсь художественной выставка. Тов арсесть тердемс од сёрмадыцят. Салононь прявтось А.И.Луценко гайневтсь «Сятков», энялдсь муемс тенст ломанть. Вана истя лиссь васенце вастовомась. Теде мейле неть вастовоматне поладовсть журналонь редакциясо.



Collapse )

САБАЕВО/СУРВЕЛЕ - Тиринь велентень алтазь книга

Р.Б.Щанкина малав 30 иеть важодсь «Эрзянь правда» газетасо корреспондентэкс. Ней роботы Равчирень финнэнь-угрань раськень культурань центрасо. Ды зярдояк а ашти тевтеме. Сон – «Ламзурь» фольклорной ансамблянь прявт, ютавтни кенярксчить, конатненень сонсь сёрмады сценарийть. Теде башка, нолдась зярыя книгат. Меельцесь эйстэст – «Моя малая Родина. Сабаево/Сурвеле». Книгань презентациясь ютась А.С.Пушкин лемсэ республикань Национальной библиотекасо. Покш залось пешксель инжеде. Тей сакшность эрьва косто ды, нама, ламот ульнесть Сурвелестэ.




Collapse )

Александр Араповонь ледстнемга чокшне

А.С.Пушкин лемсэ республикань Национальной библиотекасо ютась ледстнемань чокшне. Сон алтавсь МР-нь заслуженной поэтэнтень, Россиянь Писателень союзонь членэнтень Александр Араповнэнь. Ноябрянь 1-це чистэ Александр Васильевичнень топодевельть бу 55 иеть. Поэтэсь тусь эрямосто 2011-це иень июнень 14-це чистэ.
Тей сакшность поэтэнть малавиксэнзэ: низэ Ольга Даниловна, Аня ды Саша тейтерензэ. Истя жо ульнесть ялганзо ды творчествань вечкицянзо.


Арапов А.В.




Collapse )

Маризь Кемалень лиссь од книгазо

Оригинал взят у erisow в Маризь Кемалень лиссь од книгазо
Эрзянь содавикс сёрмадыцянть Маризь Кемалень (Кемайкина Раиса Степановна) лиссь од книгазо -- «Масторов нолдасынек сюкпрянок...». Ламо иень перть сон пурнась материалт те пусмонтень.
Книгась ушодови «Я тоже была нигилисткой» статьясонть. Истя жо книгасонть улить зярыя пелькст: КЕЗЭРЕНЬ КОЙТЬ, ЭРЗЯНЬ ОЗНОМАТ ДЫ ПАЗМОРОТ; НЕЕНЬ ШКАНЬ КОЙТЬ; ТЫНЕНК, ТЯКИНЕТЬ; МОРОТ; НЕИЗВЕСТНОЕ О САМОЙ ИЗВЕСТНОЙ (Л.А. Руслановадо очерк); ламо фотографият; меельце шкасто сёрмадозь стихть. Тесэ сермадозь ламо койтне ульнесть ютавтозь «Ламзурь» ансамблянть марто. Раиса Степановна пачти эрзянь поэттнеде, конат маштовсть войнасо. Литературной сценарийтне лездыть школасо тонавтыцятненень.



Мезесь ризнэвти, те книгась лиссь ансяк 200 экземплярсо. Кемалень валонзо коряс, сон а карми микшневеме... Авторось явшесы эрзятненень. Маласо шкасто те книгась карми путозь интернетсэяк. Сестэ васоло эриця эрзятне несызь те вадря пусмонть

«Тесэ ды тосо» од книга

Сермадыцянть туртов эрьва книгань лисемась – покш кеняркс. Маряви, ансяк исяк ульнесь Е.В.Четверговонь «Ванине» романонзо презентация. Ней жо сонзэ лиссь од книгазо – «Тесэ ды Тосо» лементь ало. Тень коряс вастовома ютась Печатень кудосо, ков пурнавкшность Четверговонь малавиксэнзэ, ялганзо, «Сятко» ды «Чилисема» журналтнэ. Од книгась ловови авторонть кеменце книгакс. Ды а стяко эрзянь поэтэсь Н.И.Ишуткин паро мельсэ шнызе сермадыцянть: «Истя сеедьстэ нолдтнят книгат – теке тантей прякат панят». Кода а шнамс авторонть? Сепомс а мезть, меельце шкане эрзянь кельсэ романонь сермадыцят арасть. Иензэ лангс апак вано, Евгений Владимирович важоди мезе вийсэ. Кода сермады сон – истя а сермады кияк, лия енова молиця формасо. Вана куш саемс «Тесэ ды тосо» романонть. Сон – сёрмасо роман. Истя жо книгантень совасть «Ламбамо нартемкс" ды лия  евтнематне.

SNV85781
Те самай од книгась. Варштадо, кода "орегенальной" лангозо. Арсизе сонсь атясь.

Collapse )