?

Log in

No account? Create an account

Previous Entry | Next Entry

«Шумбрат, Майатул!»

  Финнэнь-угрань театратне невтизь чачост  «Шумбрат, Майатул!» фестивальсэнть

Саранскойсэ октбрянь 22-31-це читнестэ ютась «Шумбрат, Майатул!» финнэнь-угрань театратнень раськеютконь 9-це фестиваль. Кода жо сон ютась? Кие мезе невтсь? Теде  евтнян тынк туртов.



DSC05657



Фестивалень 10 читнень перть Национальной театрасо мольсть спектаклят. Сынст вансть аволь ансяк инжетне, тесэ важодсь жюри, козонь совасть: РФ-нь Высшей школань заслуженной роботникесь, Театрань искусствань Российской академиянь профессорось А.Л.Ястребов, Эстониянь режиссерось, профессорось Анне Тюрмпуу, Финляндиянь театрань критикесь, журналистэсь Кирсикка Мооринг, Удмуртиянь Заслуженной художникесь Ю.Н.Лобанов, театрань критикесь, «Культура» газетань ды «Страстной бульвар» журналонь корреспондентэсь П.В.Подкладов, филологиянь наукань докторось, профессорось А.М.Каторова.

Ушодызе фестиваленть минек театрась. Сынь невтизь мокшонь кельсэ финнэнь драматургонть Х.Вуолийокинь «Юстина» мелодраманть. Омбоце чистэнть учинек Карелиянь национальной театранть. Ансяк покш тувталонь коряс актертнэ эзть саво…  Тарказост спектакля невтсть минектне. Те ульнесь Э.Портерэнь повестензэ коряс «Кенярдемань урокт» мокшонь кельсэ спектакля.

DSC05761

Финляндиянь актертнэ невтизь Е.Айпинэнь «Ханты или звезда утренней зари» драманть. Премьерась ульнесь мелят. А тедеде актертнэ ардтнесть Югрань енксов. Сынь эсест сельмсэ неиксэлизь, кода эрить хантытне, кодамо культураст. Актертнэ зярыя чинь перть эрясть вирьсэ вишка кудынесэ. Телентень анокстасть пенгть, кундсесть калт, толбандясо анокстасть ярсамопель, ютавтсть репетицият. Спектаклясонть невтезель Демьян хантынть ды целанек хантытнень эрямост.

Эстониясь невтсь «Sugrierror.com» финнэнь-угрань раськетнень стакачитнеде пьеса. Эряви меремс, те лиссь лия енов а молиця спектаклякс. Покш экрансо кадрат, морот, валт, эрьва кодат декорацият. Теде башка, те путовксонтень сынь тердсть Россиясто финнэнь-угрань актерт: хантыть, удмуртт, марить.

Коми-Пермяконь драмань театрась сакшнось Кудымкар ошсто. Сынь невтсть «Минек велесэ» а покш комедия. Сюжетэсь содавикс. Истят евкст улить эрзянь ды мокшонь кельсэяк. Эрясть-аштесть кавто ялакст. Вейкесь сюпав, омбоцесь – нужачи печтясь. Сюпавось саласы омбоценть кедьстэ вишка вашонть ды тень кисэ сынь севнозевить. Видечинь вешнеме пачкодить натой инязоронтень. Тона максы тенст содамоевкст. Эрьвась а соды, кода сынст чарькодемс. Ансяк нужачисэ эриця ялаксонть Сизимок вишка церынезэ весе содасынзе. Истя идесы тетянзо.

Горномаринь драмтеатрась невтсь «Суртвуй» («Кудазор») спектакля-притча. Сонзэ юрсо – маринь народной евкстнэ, койтне-кирдатне, моротне. Путовкссонть невтеви, мезе колы кеме семиянть, косо ванстовить виде койтне. Мезе ашти кеме семиянть юрсо? Бути кудосонть азорось видечинь ды важодемань вечкиця ломань, лия эрицятнеяк эсь тевест топавтыть – сестэ весе ули паро.

суртвуй3jpg


Ханты-Мансинь округонь обско-угорской раськетнень «Солнце» театрась невтсь «Черная песня» спектакля. Эйсэнзэ невтевить Аннань ледстнеманзо ды ононзо. Куломадо икеле авась ледстни стака эрямонть, кода ламо иеде икеле красноармеецтнэ саизь вечкевикс мирдензэ Юванонь, кадызь сонзэ кавксо эйкакш марто тайгасо, нельгизь кедьстэнзэ ружиянтькак… А содавикс ормадо мельга-мельцек туить эрямосто вечкевикс эйкакшонзо, кудо ракшатне. А мезде ярсамс, а кода муемс вирьстэнть телечине ярсамопель, секе тев кайсевить верьгизт… Аннань роленть налксить колмо актрисат, конат пачтить те трагической ды мистической историянть, кона алкукс ульнесь Казымской восстаниянь шкасто. Те шкас апак тонавтне Сибирень историясо те тамашась. Повестень сюжетэнть авторось сермадызе бабанзо Е.М.Молдановань пельде.

солце

Седе тов минек Национальной театрась невтсь «Сказания предков» мокшонь кельсэ этно-рок-опера. Сонзэ премьеразо ульнесь Тежа иетнень кенярксчинть тешкстамсто. Морасть ды налксесть те од путовкссонть «Морденс» арт-фолк группась, МР-нь Заслуженной артистэсь Сергей Семенов ды артисткась Елена Алышева, театрань актертнэ. Те путовксось лиссь мазый, музыкась кочказь парсте. Ансяк вана арасель синхронной ютавтома ды ламо ваныцятне эзть чарькоде, мезде моли кортамось…

М.Шкетан лемсэ Марий Элэнь национальной театрась невтсть «Юмынудыр» («Пазонь тейтерь») мюзикла. Эйсэнзэ невтеви маринь мифологиясь, кода Юмынудыр пазонь тейтерентень вечкевсь аволь менелень, мода лангсо эриця цера. Спектаклянь автортнэ бажасть пачтямс ваныцятненень, кода те невтеви неень шкань эрямосо. Неень шкань геройтне понгить ютазь шкас. Нама, меельцекс вечкемась изнясы кеженть.

Удмуртиянь национальной театрась невтсь «Родные корни» удмуртонь эпосонь коряс фэнтэзи. Тесэ истя жо неень шкасто геройтне понгить кезэрень шкас ды ваныть, кода эрясть покштяст-бабаст.

Коминь национальной музыкально-драмань театрась невтсть «Ясэвэй» («Вожак») Ижмо-Колвинской эпосонть коряс драма. Спектаклясонть невтеви пелеве енксонь комитнень эрямост. Тесэ невтеви Ёрна церыненть эрямозо, конань тетянзо-аванзо чавсынзе ёжов ды кежей Мандо ятось. Ламо стакачить печти церынесь, цють а кулы. Ансяк кеме обуцясь, виевчись лездыть тензэ эрямосонть. Спектаклясь содавты ваныцятнень оленень трямонь тевенть марто. Тесэ гайгить ламо морот, спектаклясь пешксе музыкадо.

Фото 138

SNV83977

Фестиваленть пекстамсто яволявтовсть изницятне. «Лучшее воплощение национальных традиций» номинациянть коряс казевсть Коминь музыкальной драмань театрань актертнэ В.Соколова ды А.Ветошкин, «За смелость сценического эксперимента» спецпризэнть саизе Эстониясь. «Авань сехте вадря роль» номинациясонть казевсь минек театрань актрисась Тамара Весеньева («Юстина» мелодрамасо Сенаторшань кеме обуцянть невтемань кисэ). «Церань сехте вадря роль» номинациясонть казевсть Финляндиянь актертнэ Ярко Лахти ды Туомасу Роунакари, конат дивавтызь ваныцятнень эрьва кодамо персонажтнень лия енов а молиця невтемасо.

«Сехте вадря спектаклякс» яволявтозь Ханты-Мансийской округонь обско-угорской раськетнень «Солнце» театранть «Черная песня» спектаклясь. Сон сехте пек тусь мельс кода жюринтень, истя жо весе ваныцятненень. Путовксось пек виев, эзизе кадо мельтеме киньгак, ваномсто ломантнень эзть кирдеве сельведест…

Поздоровонь евтамо сцена лангс кузнесь РФ-нь финнэнь-угрань раськетнень Ассоциациянть прявтось П.Н.Тултаев.

– Покш мельспаро васенцеде ютавтомс те фестиваленть эрзятнень-мокшотнень мода лангсо. Ды те виде, зярдо театратне ардтнить региондо регионс. Финнэнь-угрань эрьва раськенть эсензэ культуразо, коензэ-кирданзо, историязо. Неть читнестэ тень неинек эсь сельмсэ. Кеман, седе товгак ояксчинь сюлмотне кармить вейсэндямонок. Эдь минь эсь юткованок ялакст ды сазорт, косо бу аволинек вастово, – кортась Петр Николаевич ды евтась сюкпрянь валт инжетненень.

Фестивалень толось максозель Удмуртиянтень. 2014 иестэ тосо карми финнэнь-угрань театратнень раськеютконь юбилейной Х фестивалесь.

SNV83987

SNV83993

Куш вейке спектакель невтевельть эрзянь кельсэ...

Comments

Latest Month

June 2019
S M T W T F S
      1
2345678
9101112131415
16171819202122
23242526272829
30      

Tags

Powered by LiveJournal.com
Designed by Yasmina Haryono