matorchik (tolava) wrote,
matorchik
tolava

Categories:

Лиссь «Тиринь кель» од книга

Лиссь эрзятнеде ды эрзянь кельде од книга!

SNV83963



Саранскоень 8-це номер П.С.Кирилловонь лемсэ библиотека-филиалсо ютась литературно-музыкальной чокшне. Сон алтавсь Раиса Щанкинань «Тиринь кель» книгань презентациянтень. Тей сакшность 7-це лицеень тонавтницятне, «Ламзурь» ансамблясь. Вастовомась ютась «Мы – финно-угры, наши корни едины» Малавикс раськетнень чист тешкстамост лувсо. Эдь од книгаськак алтави минек кельтненень. Тесэ ламо мезе муят финнэнь-угрань раськетнень келень ды культурань вейсэнь ундокстнэде.

Вастовомасонть гайгсть морот, ловнозельть стихть. Лицеень тонавтницятне невтизь С.Люлякинань «Печкин рот» сценканть. Библиотекань прявтось Н.М.Бояркина саамонь кельсэ ловнось стих. А вана 2-це номер школань 10-классонь тонавтницясь Майя Лакилашвили пек парсте морызе «Мокшнень крайне» содавикс моронть. Истя жо ютавтозельть конкурст ды викторинат. Изницятне казевсть казнесэ.

Седе тов вал максозель книгань авторонтень.

– Книгасонть бажинь пачтямс весенень, мекс эряви содамс тиринь келенть. Евтнинь, кодамо мазый эрзянь келесь, кода сон явови лия кельтнень эйстэ. Теде башка, толковинь, косто саевсть те эли тона валтнэ. Веенстнэ саезельть лия кельстэ, омбонстнэ минек кельстэ тусть. Койсэнь, книгась туи мельс кода эйкакштненень, истя покштнененьгак, – кортась Раиса Борисовна.

Р.Б.Щанкина пачтясь «Торама» ансамблянь пурныцядонть В.Ромашкиндэ. Сондензэяк ули сермадозь книгасонть. Кода те ломанесь тейсь пек ламо, маштсь пурнамо перьканзо ломанть ды апак лотксе евтнемс минек культурадонть, моротнеде.

Равчирень финнэнь-угрань раськень культурань центрань важодицясь Т.Т.Чекушова пурнавозтненень евтнесь Р.Щанкинадо, косо сон чачсь, тонавтнесь ды важодсь, кода ламо мель яви эрзянь тевтненень.

«Тиринь кель» книгась лиссь мельстуиця важодемакс. Тесэ сермадозь кода гайгить финнэнь-угрань весе кельтнесэ шумбракстнемань валтнэ, зяро кадовсть раськетнеде. Мезе те келесь, кода сон тееви? Мекс ломантне кортыть эрьва кодамо кельсэ? Зяро кельть тон содат – зяроксть ломанят. Зярдо ульнесть эрзянь ды мокшотнень васенце Инекужост. Тесэ сермадозь минек паджетне, кода эрзякс мерить ковтненень ды недлянь читненень, кода евтамс вечкема валтнэнь. Максовить примерт, весе невтеви мазый фотосо. Кодат улить эрзятнень ды мокшотнень седямопелест? Кода тиринь келесь лездась Чечнясо улемстэ минек спецназонтень. Книгасонть максови ламо информация. Алкукскак, Р.Б.Щанкинань важодемась – паро казне кода эйкакшнэнь, истя покш ломанентеньгак.

SNV83965



Tags: раиса щанкина, эрзянь кель, эрзятнеде книга
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments