matorchik (tolava) wrote,
matorchik
tolava

Category:

Тонавтыцянть туртов сехте паро казнесь – эйкакштнень изнявкстнэ


Любовь Михайловна Русяева комсте ламо иеть важоди Отяжелень средней школасо. Сон вети эрзянь кель, рузонь литература, эрзянь ды мокшонь ёнксонь культурань история. Важоди 6-це, 7-це, 10-це ды 11-це класстнэнь марто. Теде башка, тонавтыцясь вети литературно-драматической кружок, ков мельспаросо яксить кода вишкине тонавтницятне, истя покштнеяк. Нама, эйкакштнень ютксо улить эрьва кодамо раськень тонавтницят. Седе ламо эрзянь ды рузонь.



Кода пачти Любовь Михайловна, школасо ули тиринь келень паро кабинетэст, тосо пурназь весе се, мезе эряви тонавтыцянтень ды тонавтницятненень: эрьва кодамо литература, учебникть, валкст, таблицат. А сатныть ансяк методической пособият. Районсояк ды республикасояк Л.М.Русяевань эрзянь келень кабинетэсь пелькстась конкурссо ды саекшнесь васенце таркат.

Ламо иень перть тонавтыцянть эйкакштне невтнить ёрокчист ды содамочист райононь ды республикань эрзянь келень ды литературань коряс олимпиадатнесэ. Сынст юксо улить призёрт ды изницят. Неть: Н.Калабаева, Ю.Варламова, А.Ермекшова, А.Шаев ды лиятне. Паро тонавтыцясь аноксты аволь ансяк превей тонавтницят, сонськак невтни прянзо покш пелькстамотнесэ.

Любовь Михайловна лиссь финалистэкс «Учитель года Республики Мордовия – 2010» конкурссонть. 2017 иестэ пелькстась «Эрзянь ды мокшонь келень сехте паро тонавтыця» конкурссонть. Аволь умок варчинзе виензэ «Самый классный классный» райононь пелькстамосо. Тонавтыцясь казезь Отяжбуень райононь прявтонть, МР-нь Образованиянь министерстванть пельде Благодарностьсэ. 2011 иестэ тензэ максозель Отяжбуе ёнксонь Администрациянь прявтонть пельде премия. 2017 иестэ казевсь МР-нь Государственной Собраниянть пельде Почётонь грамотасо. Мелят сайнизь «Равось – ояксчинь лей» этнокультурной экспедицияв. Ансяк сехте паро казнесь – эсь тонавтницятнень изнявкстнэ, эйкакштнень пельде лембе валтнэ, чевте мизолкстнэ.

Любовь Михайловна чачсь Отяжбуень Андрелесэ. Школань прядомадо мейле тонавтнесь Н.П.Огарёв лемсэ МГУ-со. Вузонть прядомадо мейле сеске сась важодеме школав. Тонавтыцянть юткошказо а эрси. Велесэ тевтнеде свал ламо. Наташа тейтернезэ тонавтни нилеце классо. Сынь вейсэ вечкить ловномо книгат, човалясо викшнеме. Тельня покш мельсэ якить сокссо, кирякстнить пандо прясто, ардтнить Эень кудосо конькасо.

Татьяна Маторкина


Tags: любовь русяева, эрзянский язык, эрзянь тонавтыця
Subscribe
  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments