?

Log in

No account? Create an account

Previous Entry | Next Entry

А.С.Пушкин лемсэ библиотекасо ютась творческой чокшне, кона алтавсь эрзянь сёрмадыцянть ды общественной деятеленть Е.В.Четверговонь 85 иетненень. Шкинемань чокшнесь мольсь шождасто, пейдемань лувсо. Тей тердезельть аволь ламо ломанть, ансяк сетне, кить малавикст: ялганзо ды малавиксэнзэ. Евгений Владимирович, иензэ лангс апак вано, эряза ломань. Содасы Интернетэнть, важоди компьютерсэ ды нолды книгат. Сон а ашти тевтеме, свал ломань ютксо.



Е.В.Четвергов чачсь 1934 иень мартонь 30-це чистэ Дубёнка ёнксонь Орданьбуе велесэ. Школань прядомадо мейле важодсь Баку ошонь М.Горький лемсэ Од ломанень театрасо, тиринь велесэнзэ – клубонь прявтокс. 1954-1959 иетнестэ тонавтнесь Пензань велень хозяйствань институтсо. 1965-1996 иетнестэ роботась Н.П.Огарёв лемсэ МГУ-со. Сон – велень хозяйствань наукань кандидат. Нолдась 60-де ламо статьят. Сон – «Масторава» эрзянь вейсэндявксонь теицятнестэ вейкесь. 1994-2016 иетнестэ важодсь «Эрзянь мастор» газетань редакторокс.

«Сиреневая луна» васенце книгазо лиссь 1989 иестэ. Теде мейле – «Велень вайгельть», «Сырнень човалят», «Иень тюст», «Янгамо», «Где цветёт чистодуш», «Эрзянь масторонть седейсэ. Имена их бессмертны», «Эрязденть арсезь», «Ванине», «Тесэ ды Тосо», «Финно-угры в русском языке», «Поладкстомо», «Сырнень човалят» валксонь омбоце нолдавкс.

Нама, сонзэ сеедьстэ кевкстнить, мезе теемс, кода ванстомс эсь прянть ды эрямс кувака пинге? Видяз атя (истя лемди эсь прянзо) корты: «Седе васов кекшинк симемапеленть, таргамонть. Уледе эрьва косо эряза ломанекс. Свал моледе икелев, мезеяк лангс апак вано. А эряви ламо удомс. Эрядо пешксе эрямосо, яводо мель культурантень ды литературантень – самай те а сатны неень шкань ломантненень».

– Зярдо Евгений Владимирович сакшны-совси тенек министерствав, свал ёвты мельть-превть, арсемат, превс путомат. Мон те ломаненть одс панжия кода литераторонть. Теде башка, сон ламо вийть путы раськень кевкстематнень решамонтень, – кортась МР-нь Культурань, национальной политикань ды архивень тевень министрань васенце полавтыцясь А.И.Карьгин.

Лембе валт тетяст туртов ёвтасть тейтерензэ Ольга ды Елена:

– Мельспаросо ледстнетяно эйкакшпингенек. Сон минек мельга вансь, тонавтсь, трясь-кастсь кода алкуксонь тетя. Оймсема читнестэ зярдояк эзинек аште кудосо. Явинек мель спортонтень, якинек вирьга сокссо, свал якинек музейга ды театрава. Сонзэ кармавтоманзо коряс тонавтнинек музыкальной школасо. Аволь весе тетятне сонзэ кондят. Тешкстасынек, зяро сон тейсь ды макссь вийть эрзянь культурантень – а онкставияк.

Сынст валост поладынзе Р.С.Кемайкина поэтессась:

– Евгений Владимирович – пек превей, чевте седей ды валдо ойме ломань. Сонсь вишкине, коськине, но зяро вий эйсэнзэ! Весе виензэ-превензэ путынзе эрзянь раськенть туртов. А стувтови, кода пурнынек «Масторава» вейсэндявксонть, мейле – «Эрзянь мастор» газетанть. Зяро сон чийнесь, лездась, топавтсь тевть!

Те чистэнть Видяз атянь туртов ёвтазельть ламо лембе валт. Покш каштанчисэ аштить корязонзо малавиксэнзэ. «Евгений Владимировичень тетязо чавовсь войнасо. Кадовсть вете эйкакшт… Кияк эзь арсе, сон тееви покш ломанекс, писателекс. Минденек, роднятнеде-раськетнеде, ламо, сон юткстонок сехте превей. Ды кодамо мельспаро ловномс эйстэнек книгастонзо!» – кортась сазорозо Н.М.Маскаева.

Вастовомасонть эрзянь морот казсть МР-нь заслуженной артисткась Мария Матезиус, «Ламзурь» ды «Толава» фольклорной ансамблятне.

Шумбрачи теть, Видяз атя! Кецявтт эйсэнек од книгасо, макст превть ды валдо мельть!



Latest Month

June 2019
S M T W T F S
      1
2345678
9101112131415
16171819202122
23242526272829
30      

Tags

Powered by LiveJournal.com
Designed by Yasmina Haryono