?

Log in

No account? Create an account

Previous Entry | Next Entry

Эрзянь ды мокшонь национальной драматической театрань актёрось Анатолий Нуштайкин комсте ламо иеть важоди театрасо. Те шканть перть сон налксесь ламо эрьва кодамо спектаклясо эрьва кодат рольть. Покшт ды вишкинеть. Ваныцятне кирдить мельсэст А.Григорьевень «Малиновая пора» (Харитон бригадирэсь), В.Шукшинэнь «Латось сыргась» (Константин),  Н.Гоголень «Женитьба» (Балтазар Жевакин),  С.Медведевень «Шуба-дуба» (Виктор Шнейдер),  К.Абрамовонь «Эрьванть эсензэ ормазо»  (Устим Харитонович) ды ламо лия спектаклятнень, косо налксесь актёрось ды невтсь лия ёнов а молиця образт. Налксемасонзо сон машты талновтомс ваныцятнень, кецявтомс, пейдевтемс эли нусмакавтомс.


Анатолий чачсь Орданьбуень райононь Пиксяська велесэ. Колмо классос тонавтнесь эсь велесэнзэ, мейле поладызе тонавтнеманзо Селища шабра велесэ. Уш се шкане сон свал ульнесь сцена лангсо. Морсесь. Зярдо энялдсть мезеяк морамс – мельспаросо тень топавтсь. Школанть прядомадо мейле кавто иеть служась армиясо, Калининградсо. Тосто самодо мейле аламос тукшнось Саратовав. Велявтсь мекев. Кармась тонавтнеме Саранскоень культурань училищань эстрадань отделениясо. Кода ледстни Анатолий, тердизь важодеме музыкальной театрань хорс. Сон эзь моле. Тусь тиринь велев, косо вейке ды пельие важодсь велень Культурань кудонь прявтокс. Велесь састыне чамсь, од ломантне тукшность эрямо ошов ды лия таркав. Анатолий Нуштайкин сыргась мекев Саранскоев. 1997 иестэ саезь кармась важодеме Национальной театрасо.

– Анатолий, кодамо ульнесь васенце ролеть, ледстяви?

– Нама, те ульнесь Н.Голенковонь «Как собака друга искала» ёвксось, косо налксинь охотникень роленть. Пельие налксинь ёвкссо, мейле вейке актёрось ормалгадсь ды мон кисэнзэ карминь налксеме К.Абрамовонь «Васолдонь инже» покш путовкссо. Мейле сонзэ невтеме сыргинек гастролев Оренбург ёнксов. Тосонь эрзятне вастымизь пек лембестэ.

Анатолий Нуштайкин – сэтьме, а покшкавтниця ломань. Ламо а корты, чаво валт а ёртни. А вечки эсь прянзо шнамо ды эсь эрямодо ёвтнеме.

Бути актёрось путы эсь тевезэнзэ весе мелензэ ды виензэ – те сеске содави ваныцянтень. Кадык сонзэ вишка роль эли, саемга, эпизод, сон ялатеке редяви ваныцянтень, кадови мельс. Истя лиссь А.Островскиень «Не в свои сани не садись» путовкссонть, косо А.Нуштайкин ёвты «Кушать подано!» валтнэнь. Ансяк кода ёвтазь неть валтнэ! Кода те невтезь!

Актёронть валонзо коряс, стака налксемс комедиясо. Бути бажат мезе вийсэ ракавтомс ломантнень – те а тев, истя а тейнить. А.Григорьевень «Велень ризнэмат» спектаклянь премьерась ютась мелят. Тосо Нуштайкин налксизе прявт героенть Антононь. Шожда ды пейдевтиця путовкссонть сонзэ героезэ сыргась шабранзо тулевксэнь саламо. Весе невтеманть перть а кирдеват, пейдят ды пейдят. Ды мелявтат кисэнзэ ваномань перть!

Бути саемс А.Пушкинэнь «Капитанская дочка» спектаклянть, тосо актёрось покш мельсэ налкси Савельичень роленть (прявт героенть Гринёвонь слугазо). Аволь покш роль, аволь прявт герой, ансяк Нуштайкин истя невтизе те героенть, сон кадовсь весень мельс.

Эрьва спектаклясонть, косо налкси Анатолий Николаевич, ваныцятне умок редизь, кода ваньксстэ, гайтевстэ ды видестэ сон корты эрзякс. Вана бу эрьвась истя маштоволь!

Кода пачти Анатолий Нуштайкин, сон пек вечки налксеме эрзянь спектаклятнесэ, вечки невтеме велень ломантнень образтнэнь. Истятнэнь, кода сонсь ды малавиксэнзэ. Актёрось чачсь покш семиясо. Вете иеть тензэ ульнесть, зярдо кулось Николай Николаевич тетязо. Авазо, Мария Николаевна, ськамонзо трясь-кепетсь кото эйкакшт. Ней вана пельие топодсь, кода сон тусь эрямосто. «А ёвтави ёжом... Авам арась – ды буто велеськак арась…» – ризнэзь корты Анатолий. Нама, истя, зярдо вальма вакссо учицят арась…

А.Нуштайкин – Финнэнь-угрань раськетнень театрань Раськеютконь колмо фестивалень участник. Казезь МР-нь Госсобраниянь, МР-нь Культурань, национальной политикань ды архивень тевень министерстванть пельде Почётной грамотасо, РФ-нь Театральной деятелень союзонть пельде Почётной грамотасо. 2019 иестэ казевсь театрань искусствань коряс МР-нь Прявтонь премиясо «Омбоце планонь сехте вадря роль» номинациясонть (А.Пушкинэнь «Капитанская дочка» спектаклясо Савельичень роленть кисэ).
Кемтяно, икелепелев сонзэ учить седеяк покш казнеть ды театрань тевсэ паро изнявкст.

Latest Month

June 2019
S M T W T F S
      1
2345678
9101112131415
16171819202122
23242526272829
30      

Tags

Powered by LiveJournal.com
Designed by Yasmina Haryono