?

Log in

No account? Create an account

Previous Entry | Next Entry

Елена Николаевна Ломшинань сеедьстэ некшнетяно промкссо, конференциясо, семинарсо, косо ванныть эрзянь ды мокшонь раськень талновтыця кевкстематнень. Эли жо невтить эйсэнзэ телевизорга, косо сон ёвтни омбо масторсо ютавтозь покш вастовоматнеде. Те шкас эзь савкшно теемс мартонзо материал. Ней жо тувталоськак ули – аволь умок эрзянь авась тешкстызе юбилеензэ. Сон ламо иень перть важоди вейке таркасо – Н.П.Огарёвонь лемсэ МГУ-нь Национальной культурань институтсо. Вечкевикс тевдензэ, эрямодонзо – самай теде ульнеськак минек мельстуиця кортамонок.



Елена Николаевна чачсь Дубенкабуень Поваделесэ. Семиясо сон ульнесь васенце эйкакшокс. Сестэ сынь ламонест эрясть вейке кудосо, секскак весе малавикстнэ явсть тензэ покш мель. Тетянзо ялакстнэ эрясть мартост, сынь ульнесть студентт, малав эрьва оймсема читнестэ ардыльть Саранскойстэ ды уш кода налксильть вишка Лена марто! Тетязо, Николай Егорович, важодсь райкомонь комсомолонь омбоце секретарекс. Авазо, Анна Михайловна, медроботник. Зярыя иеть эрясть Кайбичевасо, косо тетязо важодсь председателекс, мейле састь мекев Поваделев.

Школасо тонавтнемстэ Елена ульнесь пек ёроков эйкакшокс. Невтсь прянзо олимпиадасо, эрьва кодамо кружоксо, походсо, свал якась комсомольской активень лагерев-школав, ветясь общественной тевть. 1984 иестэ казезель ВЛКСМ ЦК-нь тешкссэ. Вечксь тонавтнеме, сёрмадомо сочиненият, дневниксэнзэ нилетькак арасельть, ансяк вететь.
Школанть прядомадо мейле сась тонавтнеме Н.П.Огарёвонь лемсэ МГУ-нь историянь факультетэв. Тесэ ушодовсь студентэнь мельстуиця шкась. Седеяк ламо од тевть, конференцият, экспедицият, ялгат…Од тейтересь мельспаросо тонавтнесь, сёрмадсь исследовательской важодемат. Важодсь «Товарищ» безвозмездной трудонь отрядсо. Ульнесь комсомольской организациянь секретарекс. Сон нейгак ледстни, кода Н.Ф.Мокшин профессоронть марто ардтнесть этнографиянь экспедициява эрзянь-мокшонь велетнева, мартост ульнесть эстонецт. Весе вейсэ пурнасть экспонатт.

Ветеце курссо тонавтнемстэ сон теевсь содавиксэкс философиянь наукань докторонть, этикань кафедрань прявтонть Рудина Ивановна Александровань марто. Еленань эрямосо сонзэ покш путовксозо. Тейтересь кармась явомо мель философиянтень. Тензэ пек вечкевсь кунсоломс лекциятнень. Сестэ появась од лем «рузонь философия», весе марявсь одокс. Еленань чачсь мелезэ сюлмамс эрямонзо науканть марто. Истя, 1990 иестэ Елена Николаевна ушодсь важодеме моралень социологиянь лабораториясо старшей лаборантокс. Иень ютазь кармась тонавтнеме «Этика» специальностенть коряс аспирантурасо. Шкадо икеле прядызе. 1994 иестэ идизе «Нравственная культура мордовского этноса» кандидатонь диссертациянть (ветицязоль Р.И.Александрова).

Аспирантурань колмоце курссо тонавтнемстэ сонзэ тердизь важодеме Н.П.Огарев  лемсэ МГУ-нь национальной культурань факультетэв тонавтомань тевень коряс деканонь полавтыцякс. Эрявсь кемекстамс тонавтомань процессэнть, анокстамс тонавтомань аравтлувт ды седе тов. Е.Н.Ломшина тонавтомань аравтлувтнес совавтсь финнэнь-угрань раськетнень историяст ды культураст коряс предметт. Ютавтсь специальностень аккредитацият, аттестацият. Пельие важодсь деканонь тевень топавтыцякс. Теке жо шкастонть важодсь этикань кафедрань преподавателекс, мейле старшей преподавателекс, 1997 иестэ саезь – философиянь кафедрань доцент. 1996 иестэ саезь – этикань коряс диссертационной советэнь член.

Сестэ факультетэнь деканокс важодсь В.С.Брыжинский. Пек превей, чарькодиця, тевень содыця. Сон маштсь кортамо ломантнень марто, маштсь кунсоломо, содась, кода теемс видестэ, топавтсь эсь тевензэ вадрясто. Мон пельдензэ ламо мезес тонавтнинь. Факультетэсь аволь умок ушодызе важодеманзо, панжинек од специальностть – актёронь искусствань, декоративно-прикладной творчествань, од кафедрат, – ледстни Елена Николаевна.
1999 иестэ Е.Н.Ломшина панжсь Мордовиянь искусствань ды культурань кафедра. Кармась те кафедрань прявтокс. Кафедранть юрсо анокстасть республикань театратнень туртов актёрт.
Ломшина студенттнэнь марто ютавтсь эрьва кодат конкурст. Вейке студентэнтень макссть сырнень медаль, Елена Николаевнанень – РФ-нь Образованиянь ды наукань министерстванть пельде диплом.

2008 иестэ саезь сон ветясь Мордовиянь этнокультурань кафедрань тевтнень. Васенцеде ютавтсь «Культурное своеобразие Мордовии: от традиции к современности» вузонь олимпиадат.
1993 иестэ Елена Николаевна якась Эстонияв, косо ютась финнэнь-угрань раськень од ломанень ассоциациянь промкс. Тосо теевсь содавиксэкс финнэнь-угрань движениянь ламо активисттнэнь марто – Яак Прозесэнь, Светлана Смирновань, Нина Нестеровань, Лариса Бурановань. Нейгак мартост кирди ялгаксчинь сюлмот. 1997 иестэ Е.Н.Ломшина якась финнэнь-угрань раськень од ломанень ассоциациянь 4-це съездэв, косо сонзэ кочкизь вузтнэнь коряс координаторокс. Тосо сон кортась финнэнь-угрань вузтнэнь сетевой взаимодействиядо ды финно-угроведениянь вейкине информационной базань теемадо. Теде мейле ютавтсь студентэнь весероссиянь покш конференцият.

2010 иестэ саезь ды те шкас Елена Николаевна вети Финнэнь-угрань культурань научно-исследовательской лабораториянть. Те вейсэндявксось топавты научно-исследовательской, образовательной, социокультурной, издательской ды медиа проектт. Елена Николаевна грант лангс сёрмады ды топавты эрьва кодат проектт. Гранттнэнь максыть Россиянь гуманитарной научной фондось, РФ-нь Образованиянь ды наукань министерствань фундаментальной исследованиянь фондось, РФ-нь Культурань министерствась. (Проекттнэнь лангсо важодеме сон ушодсь 2000 иестэ саезь).

Неть проекттнэнь вельде ютавтынек экспедицият. Кемекстынек анкетат-кевкстнемат. Сон алтазель эрзятнень ды мокшотнень коест-кирдаст, культураст ванномантень. Ардтнинек Дубёнкань ды Зубова-Полянань ёнкстнэс. Ванкшнынек, кодат койть-кирдат ульнесть икеле ды мезе кадовсь-ванстовсь неень шкас. Ульнинек райононь чисэнть, понгинек кенярксчис. Пурнынек фото-, видео-, аудио-материалт. Малав 3 тёжат материалт. Будапештэнь Этнографиянь музеев тусть 44 экспонатт. Минь пештинек сынст коллекциянть. Мейле тосо ульнесь Европань комиссия, кона пурназь экспонаттнэнь туртов макссь покш питне. Дубёнкасо экспедициясонть ульнесть 16 финнт: докторантт, аспирантт, магистрантт, ученойть-языковедт, философт. Теде мейле ютавтынек семинар Хельсинкисэ, нолдынек сборник. Итогтнень коряс истя жо ютавтынек выставкат. Саемга, Будапештсэ Россиянь наукань ды культурань центрасо (тосо невтинь экспедициянь 60 фотографият). Ней те выставканть учить Финляндиясо. Экспедициятне кандыть покш лезэ. Студенттнэ васня сыргить аволь мельсэ, кизэ… мейле, зярдо тов понгить, сеске полавтовить, сельмест палыть. Тосо аволь ансяк чийнетяно-пурнатано материалт, истя жо кунсолотано лекцият профессортнэнь пельде. Тей сыця финнтнэ ды венгратне кортыть эрзякс. Минек студенттнэнень те максы пек ламо. Монь ули «Од вий» студентэнь научной вейсэндявксом. Важодтяно од ломантнень марто. Паро, ули лезкс неть вейсэндявкстнэнень. Ульнесь грант народной медицинань исследованиянь коряс. Флора Хотвани венгрань тейтересь ютась стажировкат минек кедьсэ. 2014 иестэ ютавтынек экспедицият Торбеевань ды Теньгушевань ёнкссо, – евтни Елена Николаевна.

Ломшина кирди кеме сюлмот школатнень марто. 2015 иестэ МР-нь Образованиянь министерстванть марто ютавтсь «Эряк, тиринь кель» этнокультурной лагерь. Теде башка, топавты раськеютконь этнокультурной туризмань коряс проектт. Истя, Тампере ошсо ютавтовиця Россиянь-Финляндиянь культурань форумсонть сонзэ проектэнть РФ-нь культурань министерствась яволявтызе сехте вадрякс.

Елена Николаевна вети общественной тевтькак. Сон 2013 иестэ саезь Антул Регулень Раськеютконь вейсэндявксонь член (Венгрия), «Литова» эрзянь авань вейсэндявксонь член, «Ассамблея народов России» общероссийской общественной организациянь Мордовиянь региональной отделениянь член, Эрзянь ды мокшонь раськень регионъютконь общественной вейсэндявксонь исполкомонь президиумонь член. Ульнесь делегатокс финнэнь-угрань раськень, эрзянь ды мокшонь раськень, Россиянь раськетнень, Евразиянь раськетнень Ассамблеятнень съездтнэнь делегатокс.

– Елена Николаевна, кодат арсевксэнк маласо шкантень. Ёвтнеде, инескеть, семиядонк?
– Аравтлувтне покшт. Финнтнэ тердить сентябрясто туризмань коряс семинаров Удмуртияв. Изнинь экспедициянь ютавтомс грант, магистранттнэнь марто мольтяно Зубова-Полянань ёнксов. Сёрмадтано проектт, конат изнить, конат, паряк, арась... Весемесь саи ламо шка, пек ламо документт эрявить теемс. Мон пек вечкса эсь роботам, а вечкан кувать оймсеме… мезе-бути а саты. Од ломантнень марто истямо мельспаро важодемс!
Юрий цёрам тедеде прядызе школанзо ды карми тонавтнеме Н.П.Огарёвонь лемсэ МГУ-нь экономической факультетсэ. Кавксть ардтнесь Казанев, косо ютась школань тонавтницятнень ютксо пелькстамо. Важодемасонзо ванность эрзянь кезэрень лемтнень. Изнясь. Мартон сайния экспедициявгак. Сон корты эрзякс. Аштян кувалманзо каштанчисэ!



Latest Month

June 2019
S M T W T F S
      1
2345678
9101112131415
16171819202122
23242526272829
30      

Tags

Powered by LiveJournal.com
Designed by Yasmina Haryono