?

Log in

No account? Create an account

Previous Entry | Next Entry

Аволь умок Ицялбуесэ ютась кенярксчи. Тей пурнавкшность тёжадо ламо ломанть. Эрьва ие тесэ ледстнить Филарет чудотворецэнть, кона чачсь ды эрясь те ёнкссонть. Церьковасо, озномадо башка, юты покш крестной ход, сон ушодови Кемлясто ды пачкоди 8 вайгельбень трокс Крута Пандо посёлкас, се таркантень, косо эрясь иневаньксэсь. Цёрат ды ават, од ломанть, эйкакшт – весе ютыть вейсэ, кияк а пели кувака киденть. Ламот сакшныть ютамо эрьва ие. Сынь содыть, Филарет лезды эрьванень, кие тензэ пшкади.





Ицялонь чудотворецэсь Праведной Филарет чачсь Ицялсо 1835 иестэ. Лемдезель Филиппекс. Кулаковтнень семиясо сон ульнесь колмоце эйкакшокс. Филиппень кавто покш лелятне кармасть монахокс: Порфирий архимандритэсь ды Нектарий иеромонахось эрясть Ярославской губерниянь Свято-Толгской монастырьсэ.

Филипп вишка шкасто саезь явсь мель пазнэнь озномантень. Тетязо-авазо мелявтсть кисэнзэ, бажасть урьвакстомонзо. Свадьбань чистэнть сон кортызе одирьванть, мерсь, а карми мартонзо эрямо, ды тусь кудосто Ратор леенть чирев, кона ашти веленть эйстэ 8 вайгельбень таркасо. Шкань ютазь те таркантень састь эрямо Ицялонь ломанть, ды теевсь тосо Крутая Гора посёлкась. Сестэ Филипп тусь Саровской пустынев, косо кочкизе монахонь кинть ды тензэ максозель Филарет лемесь.

Саровсто самодо мейле Филарет таго кармась эрямо Ратор леенть чиресэ чаво таркасо. Чинек-венек сон ознось, важодсь, зярдояк эзь аште тевтеме.  Сонензэ сеедьстэ кармасть сакшномо ломанть. Кинень эрявсь лезкс, кинень – превс путома, оймавтома. Ломантнень ледстнемаст коряс, старецэсь весень вастсь, пачк несь сыцятнень, ёвтыль кода улемс, кода эрямс седе тов. Эрьвантень муиль лембе вал, эрьванть кис ознось.
Эрьва недлячистэ ды кенярксчитнестэ Филарет якиль Ицялонь церьковав. Сыль весемеде икеле ды туиль меельцекс. Весть тунда сон сась Благовещениясто леень тона чирестэ, зярдо ульнесь покш чадыведь, Раторганть сэдь сестэ арасель. Весе дивсесть, кода сон ютавсь карьсэ леенть тона чирев.
1894 иестэ Ицялонь церьковась пожардо мейле палсь. Эрицятне 1902 иестэ стявтсть Михаило-Архангелэнь од храм, кона нейгак важоди. Филарет свал лездась настоятелентень Флавий Миловскойнень. Мезезэ ульнесь – кандсь церьковань стявтомс.
Сыречисэ Филаретэнь турвас лиссь покш таргозевкс (опухоль). Сонензэ мерсть теемс операция, ансяк старецэсь эзь саеве, сон кортась: «Те раень цецят, мезекс мон сынст яжасынь».
Кулось Филарет 1913 иень августонь 21-це чистэ. Сонензэ ульнесть 78 иеть. Калмазель Ицялонь церькованть вакссо. Куломадонзо мейлеяк калмонзо лангс сакшныльть лезкс мельга ломанть. Ды сон лездась.
1999 иестэ ютась канонизация, Филаретэнь лемензэ совавтызь Саранскоень ды Мордовиянь иневанькстнэнь юткс. Сакшность пек ламо ломанть. Филаретэнь ледстнемга Ицялонь эрицятне стявтсть Ромодановань ды Ицялонь районтнэнь ютксо киот. Те – кичиресэ стявтозь иневаньксэнь ликенть марто пазава.

Чудотворецэнть куломадо мейле ютасть ламо иеть. Ансяк сонзэ кияк эзизе стувто. Бути кортазевемс Ицяло ёнксонь эрицятнень марто, эрьвась ушоды мезеяк сондензэ ёвтнеме. Мощанзо ванстовить Ицялонь Михаило-Архангелэнь церьковасо. Тесэ эрьва недля ловныть сонензэ акафист. Теде башка, апак кадо Крута Пандо посёлканть вакссо келиянзо вакссо таркась. Сон весе паролгавтозь: стявтозь часовня, косо аштесь келиясь, путозь крёст, улить ламо озамо таркат, чави лисьмапря.

Вана уш кемготово иеть, кода те чаво таркантень эрьва иень август ковсто юты крестной ход. Иеде иес тей пурнавкшныть седеяк ламо ломанть. Тедедеяк крестной ходось ушодовсь Кемлясто. Теде икеле ютасть церьковасо покшчинь озномат. Мейле весе пурнавсть Ицялонь церькованть ваксс, косто ломантне сыргасть ялго Крута Пандонть ёнов. Те – 8 вайгельбеть модань киява. Ютамонь перть ломантне озность ды моравтсть. Сынь пурнавсть семиянек, састь вишка эйдест марто. Ардсть лия велетнестэ, шабра регионтнэстэ. Маряви, а ютави кись, пси, таркась аволь маласо, ломантне ютыть эрязасто. Варштат удалов – песь а неяви, истя ламо ломанть молить. Пелекилангсо, зярдо печтяви леесь, яволявтсть аламос оймсемс. Весе куроксто озасть пиже луганаронть лангс (тесэ Ратор леенть поймась), кармасть симеме ведте, конань ускизь крестной ходонь анокстыцятне. Шкань ютазь весе стякшность ды сыргасть икелев.

Крута Пандо кадозь посёлкась ашти вере, пандо прясо, сон ней чамсь, аштить ансяк вейке-кавто каладо кудот, лиятне палсть 2010 иень пси кизэстэнть, касыть ламо чувтот. Кузинек верев, совинек чувтотнень-куракштнень потс – ды самай тесэ часовнясь, Филаретэнь пустынесь. Те лашминесь прок кекшезь, костояк а неяви, ашти тусто куракш потсо. Тесэ сеске жо ушодовсь службась, ловнозельть акафист ды молебен. Сондензэ мейле весе пурнавозтне ютасть Филаретэнь пазаванзо алга, токшизь скуфьянзо (пряс путомазо) ды веригтнень.
Седе тов яволявтовсь оймсема. Весе инжетнень каванясть медь марто ликшань кашадо, тантей арбуздо ды чайде. Малав тёжа ломанть, паряк, седеяк ламо! Кинь ульнесь мелезэ, пештсть лисьмапрясто ведь, экшелясть, валность рунгост лисьмапрянь ведьсэнть.
Тей сеедьстэ сакшныть лезкс мельга сэредиця ломантне, сетне, кить пиштевтить онкологиянь орматнеде ды лиядо. Ульнесть истят тевть, зярдо кувать а чачтыця аватне тей самодо мейле чачтыльть эйде.

Аволь васенце ие тей сакшны Анна Фёдоровна Макарова. Сон Полдаська велень. Сы иень февралень 10-це чистэ сонензэ топодить 90 иеть! Нама, сыречинь кувалма ялго эзь ютаво, ускизе нуцьказо. Анна сырькайнесь зярс эряза, эсь превсэнзэ ды вана мезе ёвтнесь.

«Филарет ломанесь минек, эрзянь. Сон эрямстонзо кортась: «Бути кулан, ялатеке сакшнодо тень, мон карман лездамо». Тетязо Семён ды авазо Акулина урьвакстызь, сон эзь карма эрямо одирьванть марто, тусь кудосто. Анастасия нись ялатеке эрясь кедьсэст. Кандыль Филиппнень муськезь оршамот, ансяк се таркантень а совиль. Мейле Филя (истя мерсть Филаретнэнь) эзь мере тензэ сакшномс. Зярдо нись кулось, Филарет мольсь калмамонзо, сон ознось ды авардсь, мерсь: «Монь кувалма ламо савсь теть важодемс...» Анастасия пингензэ перть эрясь атявтонть-ававтонть марто.
Филарет чадыведь шканеяк кода-бути пачкодиль церьковав! Мейле ормалгадсь, больницяв эзь моле. Кортась: «Пазось монень изюм путсь». (Истя кортась турвасонзо опухольденть). Батюшкатне саизь сонзэ Ицялов.
Весть састь сонензэ Полдаськань кавто ават, кандсть коцт. Вейкенть сон кучизе леев ды мерсь муськемс коцтонть. Сон мольсь, нолдызе коцтонть ведьс, тона мекев кодаяк а таргави! Эйзэнзэ педясть мезть понгсь, аволь парт тикшеть-касовкст… Эль таргавсь тензэ, сась ды ёвтни, мекс истя. Филарет тензэ мери: «А тон мекс ялганть коцтонзо полавтык? Мекс саик сонзэ эстеть?» Ламо истят тевть-валт, весе а ледстявитькак…Филарет пек виев. Сон алкукс лезды эрьвантень, кие пшкади, вана истя, тейтернем…» – прядызе ёвтнеманзо Анна бабась ды витизе ашо пацинензэ.

Ицялов сыргинек оймсемадо мейле. Таго жо вейсэ весе ютасть ознозь. Мекев кись эзь маряво истямо стакакс, сиземаськак марявсь шождынекс. Тагояк весе совасть церьковав, косо сюконясть мощатнес. Иоанн батюшкась явшесь эрьванень Филаретэнь фотография, кона теезь чудотворецэнть эрямстонзо. Маряви, снимазь келиянзо вакссо чувтотне-куракштне нейгак истят тосо.



Latest Month

June 2019
S M T W T F S
      1
2345678
9101112131415
16171819202122
23242526272829
30      

Tags

Powered by LiveJournal.com
Designed by Yasmina Haryono