matorchik (tolava) wrote,
matorchik
tolava

Categories:

Храброй Мишадо евтнема

Михаил Седойкин марто мон теевинь содавиксэкс Интернет вельде. Тосо сон седясь гармониясо ды морась «Кува чуди Сэняж лейнесь?» седейстокиця эрзянь моронть. Церась озадо инвалидэнь коляскасо… Ваныцятне сермадсть моронть алов ламо паро валт. Морыцясь прянь апак шна евтась тенст сюкпрянь валт ды мезеяк эсензэ ланга эзь пачтя. Чачсь мелем сюлмавомс мартонзо ды кортамс. Зярдо теевинек содавиксэкс ды Михаил евтнесь эсь прядонзо, мон сеске меринь эстень: сондензэ ЭРЯВИ сермадомс. Эри сон Хабаровской краень Комсомольск-на-Амуре ошсо. Минек енксонь шканть марто явить сисем част. Зярдо обед енов гайневтинь тензэ скайп вельде, сынст уш ульнесь чокшне.

китай 2004

Чачсь Михаил 1960-це иестэ Дубенка енксонь Кенде велесэ. Мария Алексеевна ды Григорий Николаевич тетязо-авазо кастсть-трясть ниле церат: Викторонь, Николаень, Иванонь, Миша – сехте меельцесь. Зярдо сонензэ ульнесть колмо пель марто иеть, тетязо тусь эрямосто. Сон паро ладсо а содасыяк тетянть. Ансяк вейке ледстявкс – сеяк сувонь пачк, буто ашти тетязо кузтембесэ ды тарги. Авазо кадовсь ськамонзо цела пизэ эйкакшт марто. Ансяк сонсь соды, кодамо стакаль тензэ стявтомс сынст пильге лангс. Сехте покш цераст Витя теевсь тенст тетякс, вансь весень мельга, тонавтсь.
– Минь эзинек некшне авань. Чинек-венек сон роботасоль. Валске сти пиже-пелеветь – фермав. Чокшне таго текесь, ламо шумбрачи емавтсь. Паро важодеманзо кисэ колхозонь правлениясь лездась стявтомс од кудо,– евтни Михаил.
Кода-бути весть Иван ялаксонтень рамасть гармошка. Сон Мишадо парсте тонавтнесь школасо. Мишаньгак чачсь мелезэ варчамс виензэ. Сон салава, зярдо кудосо кияк арасель, саилизе кедьс гармошканть ды ушодыль седямо. Те тевесь пек вечкевсь тензэ. Ды тонадсь седямо сонсь!  Иванонь жо яла тонавтсть тонавтыцятне…
Теде мейле Мишань седямонзо маризе Кенде велень культурань кудонь прявтось Раиса Степановна Святкина. Авась сеске редизе – Мишасто лиси алкуксонь музыкант. Ды эзь маняво. Михаил те шкас лембе валсо ледстни Р.С.Святкинань, кона пек лездась тензэ. Мишань кисэ сон эрявикс шкане панжтнесь культурань кудонть. Мишань ульнесь лелязо Геннадий Михайлович Седойкин, кона парсте седясь баянсо. Сонгак ламо лездась церынентень. Михаилэнь сайнизь Дубенкав райононь олимпиадав морамо. Тосто сон сась изнявкс марто. Кецямозо церыненть аевтавишкаль. Те шкас кирди мельсэнзэ «Как поют дрозды»  моронть.
Кавксоце классонь прядомадо мейле Миша сыргась тонавтнеме Саранскоень музыкальной училищав. Пек кучсь эйсэнзэ Раиса Степановна. Колхозось макссь тензэ направления. Истя, Миша кармась тонавтнеме дирижерско-хоровой отделениясо. Морамо тонавтнесь РСФСР-нь заслуженной артистэнть Д.И.Еремеевень пельде. Тонавтнема шканть перть эрзянь церась кенерсь аволь ансяк морсеме, сон ламо мель явсь спортонтень. Вечксь якамо сокссо, чийнеме. Каникулатнестэяк эзь аште тевтеме. Дубенкань райононь культурань кудось саилизе агитбригадав, конань марто сон морсиль велень  важодицятнень икеле, пионерэнь лагерьсэ.
1980-це иестэ, училищанть прядомадо мейле, Михаилэнь саизь армияв. Понгсь сон Дальней Востоков. Служась Комсомольск-на-Амуре ошонь военной оркестрасо. Ды кадовсь служамо тоско 1992-це иенть самс. Эзизе кадо спортонть. 1983-це иестэ сокссо чийнемасо лиссь спортонь мастерэкс. Заочна получась юридической высшей образования. Кавто иеть важодсь милициясо.

1987

Стакакс кармась Михаилэнь туртов 1994-це иесь. Сон а вечки ледстнеме се зыяндонть, кона теевсь мартонзо. Сивсь эрьге ловажазо (позвоночник), Михаил лоткась якамодо, теевсь 1-це группань инвалидэкс. Эрявсь ламо шкань перть  ютамс реабилитация. Сонзэ ютызе Новокузнецкойсэ, тосо ули Россиянь реабилитациянь сехте паро центра. Весе те шканть перть вакссонзо свал ульнесть малавиксэнзэ, важодемань коряс ялганзо. Тарка лангсо велявтнесть эйсэнзэ  часонь ютазь. Стака ульнесь весе тень лангс ваномс, ды ледстнемскак… Эрзянь церась пря эзь нолда. Васня сон бажась якамс костыль максо. Ансяк те эзь лисе. Врачтне мерсть: иля, прат, седеяк пек томбават. Седойкин одс тонавтнесь аштеме озадо. Зярыя шкань ютазь сон озась инвалидэнь коляскас. 2000-це иенть самс сон пурнась вийть. Мейле ушодовсь прок од эрямозо. Кизна церась лисни таксисэ важодеме.

Ламо лембе валт евты Михаил нидензэ – Ирина Петровнадо. Сынь свал вейсэть. Теевсть содавиксэкс теке жо ошсонть. Налксесть свадьба. Иень ютазь чачсь Семен цераст. Сон ней эри Хабаровскойсэ. Аволь умок урьвакстсь. Курок Седойкинтнэ кармить покштякс-бабакс, учить нуцькине.
Сень лангс апак вано, што Михаил инвалид ды ашти коляскасо, сон эзизе кадо вечкевикс тевензэ – морамонть, седямонть. Нама, озадо морамс седе стака. Лексемс эряви тунь лиякс.  Михаил Григорьевич сеедьстэ эрси морамонь фестивальтнесэ, конат эрсить сынст ошсо, крайсэнть. Теде башка, 2004-це иестэ сон лиссь «Филантроп» раськеютконь конкурсонь премиянь лауреатокс. Морась Россиянь Малой театрасо Московсо, Швейцариянь Женева ошсо. 2006-це иестэнть тердтнизь морамо Китаев.
седойкин,лариса лужина,
Лариса Лужинань марто

Тосо ульнесь кавто недлянь перть. Вакссонзо ульнесь Семен церазо. Мартонзо якасть Россиянь содавикс морыцят, Михаил ськамонзоль юткстост инвалид. Весе марто теевсь ялгакс. Эрьва ие Седойкинэнь тердтнить морамо Хабаровскоев.


людмила рюмина марто
Людмила Рюминань марто


Морамось сась тензэ аванзо пельде. Чамань коряскак сынь пек малавикст. Мария Алексеевна эрямонзо перть морсесь «Эрзянка» Кенде велень народной ансамблясо. Витя ялаксозояк морсекшни.
– А чарькодян, кона шкане авам кенериль морсеме? Чинь-чоп важодсь. Косто вийть сайсь? Ледстян, кодат ульнесть аватнень вайгелест! Те шкас пилесэнь марявить моронь гайгемаст. Морамонь национальной оршамопельтнень пурнасть весе районга. Алкуксонь ульнесть. Пек бажан муемс сынст моронь сермадовкстнэнь, косо моры авамгак. Вешемс, паряк, киньгак? Арсян, сынь косояк архивсэ ванстовить, – мелявтозь корты Михаил.

img040
"Эрзянка" ансамблясь

Сонсь Михаил Седойкин седи гармошкасо, баянсо. Вечки морсеме народной морот. Истя жо моры Магомаевень, Кобзононь, Захаровонь репертуарсто. Ды аволь умок моразевсь эрзякс. Интернетсэ совась «Эрзянь вал» группантень, косо ламот пшкадсть тензэ морамс мезеяк тиринь, эрзянь. Покш Игнатбуень тонавтыцясь Римма Жегалина кучсь тензэ рузонь содавикс моротнень эрзянь кельс ютавтовкст. Эрзянь аванть энялдоманзо коряс терявтсь морамс сынст. Пек парсте тензэ удалась! Эрзянь интернет-аудиториясь, теке вачомозь, каявсь тиринь кельсэ гайгиця моротнень кунсоломо. Михаилэнь моротне вастозельть лембестэ, теке мерят, пек кувать учость сынст... Тевесь сыргась. А зяро паро валт сермадсть тензэ кунсолыцятне! Вешсть морамс эште ды эште. Сермадсть аволь ансяк моронь видеотнень алов, истя жо эстензэ Михаилнэнь.

photos

– Эрян Комсомольск-на-Амуре ошсо 30 иеть. Эрзякс кортамс тунь а кинь марто. Келенть малав стувтыя. Интернетэнь коряс весе сермадыть тень эрзякс. Содат, васня стакаль тень, а чарькодилинь весе валтнэнь. Аламонь-аламонь, ней тонадовсь, бажан максомс каршо валт эрзякс. Сюконян Римма Дмитриевнанень, сонзэ арась музыкань образованиязо, ялатеке, эрьва валонть ладясы мелодиянтень ды морави шождасто. Паро бу морамс мезеяк неень композитортнэнь, ули истямо мелем, – евтни Михаил.

getImage (3)


Кунсолодо!



Меельцеде Мордовиясо Михаил ульнесь 1993-це иестэ. Комсь иеть уш топодсть. Ансяк сонсь соды, кодамо покш мелезэ пачкодемс тиринь енксов… Вастовомс роднянзо-раськензэ марто, конатнеде пек ламо. Ризны, арась видьстэ Саранскоев ливтиця самолет. Теемс зярыя пересадкат пек стака. Авазо тусь эрямосто 2008-це иестэ. Ялакстнэнь, сазортнэнь марто корты свал телефонга, ней – Интернет вельде. Сюлмавкшны скайп вельде Московонть, Саранскоенть, Кенде веленть марто – седееськак витеви.
Михаилэнь покштянзо ульнесть кото ялакст-церат. Весе сэрейть, шумбрат, виевть, кеметь, теке тумот. Эйстэст натой пельсть. Ды лемдясть сынст Храбройть. Теке лемсэнть мерить Михаилнэньгак – Храброй Миша. Сонгак истямо жо сэрей, виде рунго, валдо чама, мездеяк а пелиця. Эсь прянзо лови уцяскавокс, эрямонзо перть вакссонзо свал паро ломанть, конат лездыть ды зярдояк а митядызь.

IMG_3963



Кунсолодо, кода моры Михаил Григорьевич:







Ю-тубсо Михаилэнь лопазо, кунсолодо тосто лия моронзо:
http://www.youtube.com/user/1960515/videos?view=0&flow=grid
Tags: #михаил седойкин, михаил седойкин, эрзянь морыця
Subscribe

  • Мордовиясо улемась макссь тензэ вийть!

    «Эрзянь правда» газетась аволь весть сёрмалесь Михаил Седойкиндэ, кона эри Хабаровской краень Комсомольск-на-Амуре ошсо. Эрзянь…

  • Пии-палы вечкевикс тевсэнзэ

    Самара ёнкссо ютнить эрзянь ламо кенярксчить. Кода областень прявт ошсо, истя жо районтнэсэяк. Вейкеяк истямо покшчи а менсти морыцясь Анатолий…

  • КИШТЕВТИЗЕ ЯКУБОВИЧЕНЬГАК…

    2014 иестэ «Поле чудес» телепередачасо жойнезь гайгсь эрзянь моро. Вановтом каия телевизоронтень. Тосо ульнесть эрзянь оршамопельсэ…

  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 2 comments