Любовь Михайловна Русяева комсте ламо иеть важоди Отяжелень средней школасо. Сон вети эрзянь кель, рузонь литература, эрзянь ды мокшонь ёнксонь культурань история. Важоди 6-це, 7-це, 10-це ды 11-це класстнэнь марто. Теде башка, тонавтыцясь вети литературно-драматической кружок, ков мельспаросо яксить кода вишкине тонавтницятне, истя покштнеяк. Нама, эйкакштнень ютксо улить эрьва кодамо раськень тонавтницят. Седе ламо эрзянь ды рузонь.

Кочкурбуень Вирь ало Тавлань В.И.Ромашкинэнь лемсэ Этнокудонть вакссо ютась покш ды мельстуиця тев. Тесэ кудонть удало пирентень озавтозельть од чувтынеть. Истямо мелесь умок сась превс Этнокудонь прявтонтень, чувто ланга керсицянтень  Пётр Рябовнень.

– Минек Этнокудонтень тедеде таштамковонь 6-це чистэ топодить 13 иеть. Ламот кевкстнить, мекс а путтадо мезеяк. Монськак тень лангсо кувать арсинь. Мекс бу а теемс эрзянь раськень каштанчинь садпире? Минек улить ламо эрзянь ломанть, конатнень покш путовксост эрзянь раськентень, культурантень, келентень, сынст лезэв виест пиезь пии, лаказь лаки. Кадык озавтыть чувтот! Эрьванть карми эсензэ чувтынезэ, косо тешкстазь лемезэ. Те сюпалгавтсы минек экспозициянок, седе ламо макстано информация экскурсияв сыцятненень: кодат улить сёрмадеенек, артыцянок, морыцянок. Чувтынетнень саинек вирьстэ: пичинеть, кузнэть, пекшинеть, килейнеть, пизёлкст, лёмзёркст. Теде башка, паро ломанесь А.Аверьянов макссь тенек кемгавтово чувтот: умарькст ды чевгельть, – кортась Пётр Владимирович.

А.С.Пушкин лемсэ библиотекасо ютась творческой чокшне, кона алтавсь эрзянь сёрмадыцянть ды общественной деятеленть Е.В.Четверговонь 85 иетненень. Шкинемань чокшнесь мольсь шождасто, пейдемань лувсо. Тей тердезельть аволь ламо ломанть, ансяк сетне, кить малавикст: ялганзо ды малавиксэнзэ. Евгений Владимирович, иензэ лангс апак вано, эряза ломань. Содасы Интернетэнть, важоди компьютерсэ ды нолды книгат. Сон а ашти тевтеме, свал ломань ютксо.

Эрзянь ды мокшонь национальной драматической театрань актёрось Анатолий Нуштайкин комсте ламо иеть важоди театрасо. Те шканть перть сон налксесь ламо эрьва кодамо спектаклясо эрьва кодат рольть. Покшт ды вишкинеть. Ваныцятне кирдить мельсэст А.Григорьевень «Малиновая пора» (Харитон бригадирэсь), В.Шукшинэнь «Латось сыргась» (Константин),  Н.Гоголень «Женитьба» (Балтазар Жевакин),  С.Медведевень «Шуба-дуба» (Виктор Шнейдер),  К.Абрамовонь «Эрьванть эсензэ ормазо»  (Устим Харитонович) ды ламо лия спектаклятнень, косо налксесь актёрось ды невтсь лия ёнов а молиця образт. Налксемасонзо сон машты талновтомс ваныцятнень, кецявтомс, пейдевтемс эли нусмакавтомс.